Psa 85 | NdeIBE | STEP | Kumqondisi wokuhlabela. Elamadodana kaKhora. Ihubo. Ulithandile ilizwe lakho, O Jehova; uyibuyisile inhlanhla kaJakhobe.

Psalms 85

1 Ulithandile ilizwe lakho, O Jehova; uyibuyisile inhlanhla kaJakhobe.

2 Wazithethelela iziphambeko zabantu bakho wazisibekela zonke izono zabo.

3 Walubuyisela eceleni lonke ulaka lwakho wakufulathela ukuthukuthela kwakho okwesabekayo.

4 Sivuselele njalo, O Nkulunkulu Msindisi wethu, ukubeke khatshana ukukucunula kwethu.

5 Uzasizondela kuze kube phakade na? Uzalugcina ulaka lwakho kuzo zonke izizukulwane na?

6 Kawuzukusivuselela na, ukuze abantu bakho bathokoze kuwe?

7 Sitshengise uthando lwakho olungaphuthiyo, O Jehova, usinike insindiso yakho.

8 Ngizalalela lokho uNkulunkulu uJehova azakutsho; uthembisa abantu bakhe ukuthula, abangcwele bakhe – kodwa mabangabuyeli ebuwuleni babo.

9 Ngempela insindiso iseduze kulabo abamesabayo, ukuze inkazimulo yakhe ihlale elizweni lethu.

10 Uthando lokuthembeka kuyahlangana ndawonye; ukulunga lokuthula kuyangana.

11 Ukuthembeka kuphethuka emhlabathini, ukulunga kukhanya phansi kusezulwini.

12 Ngeqiniso uJehova uzanika okulungileyo, lelizwe lethu lizathela isivuno salo.

13 Ukulunga kuhamba phambi kwakhe kulungisele izinyathelo zakhe indlela.